È cusì, Dìu creò u pòpulu Corsu.

A Corsica lampata à i ghjacari

In u so libru La France des minorités stampatu in 1965, scrivi Paul Sérant : "I Corsi sò forsa u solu populu contru à chinni i Francesi ani, à li volti, fattu accusi simuli à quiddi chè l'antisemiti facini contru à i ghjudei."Da 1769, semu tranchji, traditori, vigliacchi, dinunciatori, dilatori, sculturati, salvatichi, criminali, assassini, maffiosi, ecc. Tandu, tocca à lampacci à i ghjacari è facci spariscia. V'eccu ciò ch'eddu "pinsava" u culineddu Alexandre de Roux, "pacificatori" di u Niolu in 1774 : "Si spera ch'eddu ùn cumpiarà u mesi ch'e no ùn sbucchessimi à stirpà sana sana issa razza". Sendu un fiascu, quand'eddu schiatta a Prima Verra Mundiali, ùn s'attempa. U 5 d'aostu 1914, i quattru battagliona di u 173u Regimentu d'Infantaria sò imbarcati in Aiacciu pà Marseglia. U 20 d'aostu, l'omini sò ingaghjati in a Battaglia di Dieuze. À causa finita, sò cinquanta milla corsi, i nosci ziteddi, chì andarani in i fussetta, sottu à u cumandu d'ufficiali incumpintenti quant'è inumani. Ci sarà dodici milla morti. Ci sarà diciottu milla ferti. Ci sarà u dolu scundisatu di nettu di i mammi, di i babba, di i veduvi, di i figlioli, masci è femini. Eccu u bilanciu di "l'arribuli maceddu", sicondu u brionu di A So Santità Benedettu XV. Duranti l'anni è l'anni, in parechji di i nosci paesi, a prucissiò di u 15 d'aostu sarà chjamata a prucissiò di i veduvi. I suldati corsi ùn tiniani parmissioni chè ogni sei mesa (inveci di trè o quattru mesa pà l'altri suldati). Beddu prestu, ani purtatu l'attimpata ad un annu ! Sarà statu par via di a diffarenza di populu ? Ani contu cosi tarribuli, a sera à a veghja, da ch'eddu ùn si vidissi i so lacrimi, quiddi anziani chì a s'erani francati da issu cunflittu atroci. Ma a so boci snaturata palisava u so scummossu. Com'eddu si mittia in capu à i Corsi i disfatti, i medichi militari ricusavani di curà quiddi chì faciani parti di u 173u. Par via, i ferti, quand'eddi n'aviani a forza, si cacciavani l'insegni di u so Regimentu, da ùn essa ricunnisciuti. Ùn a lighjareti quista in nissun libru di Storia. L'emu letta annantu à i labbra di quiddi chì l'ani vista. In un testu stampatu in u 2000 in Le Monde, scrivi Michel Rocard, anzianu Prima ministru : "Duranti a verra di u 14, s'hè mubilizatu in Corsica finu à i babba di sei ziteddi, ciò chì mai ùn s'hè avutu l'anima di fà in cuntinenti, () par via, in u 1919, ùn c'era quasgi più in Corsica omini abbastanza in gamba da ripiglià i travagli di a campagna." Hè un pezzu sanu di u populu corsu chì hè statu sacrificatu, "stirpatu". Veni à dì u populu di i campagni, a multitudina di l'ignuranti. I nutabili, i so figlioli, i "sgiò" ùn ani risicatu a so vita. Teni troppu valori a so peddi pà mantena i privileghja. In seguita à issi numignuli valutici da u gustu francesu, ci chjucchemu avali quidda di razzisti. Cusì, in quant'à u pattu SNCM-STC signatu da pocu, u ministru Devedjian vitupareghja : "Si tratta d'un pattu etnicu scandalosu. U cuncetu ghjuridicu di Corsu ùn asisti in u drittu, pur chè à cascà dinò in a miccanica ghjuridica di a definizioni di u statu di ghjudeu sottu à l'accupazioni." Ci mancava u sughjedda di a pessima infamia : razzisti. Eccu fattu. Da a Corsica, nisciun ghjudeiu ùn hè partitu pà i campi alimani. Sappiati, o ministru Devedjian di poca durata, chè da i tempa landani, a Corsica hà saputu accoglia à tutti. Ci vuleti fà spariscia ?
Rinsignetivi apressu à u sinistru Papon, ministru di u vosciu partitu, à l'ordini di Vichy com'è quiddu chì porsi criaturi pà i camari à gasu, prifetu di l'accidiu di Charonne, di a ciacciata di l'Algeriani in a corti di a prifittura di pulizza di Parighji, in u cori di u vosciu Statu culbertistu, rigalianu, quiddu di u Codici neru, di a rivucazioni di l'Edit de Nantes, di l'apartheid. Parleti di Drittu ? Ma a leghji ùn hè u Drittu. A leghji dipendi da unu Statu. Spiremu chè a leghji di Pétain ùn hè a stessa ch'è quidda di Chirac. U Drittu apparteni ad a vulintà universali di l'umanità da i tempa landani. A voscia leghji ùn hè capaci à cambialla. Hè imprescrittibuli issu drittu. Arimani quant'è oghji, com'è Maria Gentile sfidendu à u boia francesu, a Corsica, Nazioni senza Statu, hè un' Antigona di pettu à u Statu Creonu.