Li Cansoun d’Amour en Prouvènço

* Accuei
* Atuau
* Journau
* Divers
* La Lengo
* Li Cous
* Cènt. de ressourso
* Ancian numero
* abounamen
* Liame
* Enfourmacioun
*





159


Li Cansoun d’Amour en Prouvènço.

Li libret dóu Ventour.

Felibre e Reneissènço d’O.

Lou cansounié.

Me dison Camarina.

Tiatre de Prouvènço, d’O e de Catalougno.

De l’aubo au calabrun.

Glaude Seignolle.

Jan Castagno.





159


Li Cansoun d’Amour en Prouvènço.

Ensignadou.

Prouvèrbi pèr l’estiéu que s’acabo.

Que de bonur...

Editouriau :
Ano, ma sorre Ano?

Novo- Assabé.

L’Evenimen
Dau vers la 22enco jouncho!

Signalisacioun - Foutò dóu mes

Festenau Prouvençau - Cansoun - Tiatre.

Pèr aprene lou prouvençau.

Li gènt d’eici.

Li libret dóu Ventour.

Felibre e Reneissènço d’O.

Lou cansounié.

Lou proublèmo di Rom.

Camp de Salié.

Me dison Camarina.

Tiatre de Prouvènço, d’O e de Catalougno.

Rintrado de Vaqui.

De l’aubo au calabrun.

Espacejado dóu barrulaire à velò.
Qunto calourasso!

Fèsto e Manifestacioun Prouvençalo.

Óumage à Pau Roustan.

De l’óurigino di Fiò de Sant-Jan.

Mèfi! l’ambrousìo encò nostre Leberoun.

La batelarié roudanenco d’antan.

Glaude Seignolle.

Jan Castagno.






La batelarié roudanenco d’antan

I’a quàuquis annado Brunoun Eyrié, un dis especialisto li mai saberu de la batelarié roudanenco, avié fa uno recoustitucioun de l’alage em’ un chalant e li chivau de tiro presta pèr sis ami qu’abarissien de chivau pèr tira li carreto ramado, evenamen qu’es esta filma e presenta pèr Vaqui. La doucumentacioun qu’avié acampado nous permet vuei d’evouca l’ufanous mestié di marinié d’antan. Brunoun Eyrié nous a leissa tambèn un esmouvènt pouèmo, Lou Rose, ounte se lagno de l’estat dóu grand flume, cresta, descara, embruti. Sa mort i’a espargna uno darriero doulour : a pas sachu lou councha dóu flume pèr li PCB! Vaqui un tros leva de soun pouèmo :


Quand’mé si marinié planta sus la grand barco,
Si long péu ié toumbant en cadeneto blanco,
Aqui dre au gouvèr e baiant l’endrechiero
Pèr arriba enfin, lou proumié à la Fiero,
Mèste Apian a pas vist lou Rose encadena,
Li barrage gigant, soun flot canalisa,
Lis usinasso fèro, l’atome lou narga!
E soun aigo negrasso, de petròli envisca,
Si ribo roucassouso, soun vanc despoudera!
Noun Apian a pas vist lou Rose espeiandra!

Mounte siés Rose fièr?
Mounte es toun aigo cando?
Mounte es toun courrènt fèr
Que lou Mistrau desbrando?.

L’ourganisacioun de la batelarié

Dins Lou Pouèmo dóu Rose de Frederi Mistral, un di persounage principau de l’obro es Patroun Apian. Èstre patroun dins la batelarié d’antan acò voulié dire coumanda. D’efèt lou patroun, vertadié mèstre à bord après Diéu, èro carga de la manobro. Dounavo lou cop de partènço e s’óucupavo dóu cargamen e dóu descargamen di marchandiso. Tout ço que toucavo la lougistico èro fisa au coundutour. Pèr ço qu’èi dóu mèstre d’equipage, èro lou financié di rigo. Soun equivalènt sus mar sarié esta l’armatour. I’avié de vertadiero dinastìo de mèstre d’equipage coume li Bonnardel à Lioun, li Marthouret o li Cuminal à Serriero (1).

L’alage èro lou fa d’uno autro meno d’entre-prenèire : li veiturin.

Lou prouvié (2) o l’ome de pro èro lou segound de la barco-capitàni. Escandaiavo lou flume em’ uno pagello, long pau de sause espeia mai que i’avien leissa d’anèu de rusco pèr l’aiela (3). La mesuro se fasié en pan (4). Lou Rose de l’epoco èro geougraficamen e teinicamen trenca en mudo. Chasco mudo èro lou relarg d’un mudaire, pilot carga di passage dangeirous que la maire dóu flume èro en perpetualo mudanço en resoun dis eigado

Li barco

Se pòu faire uno tipoulougìo di barco roudanenco. La mai espandido èro la pinello (24m/4,30m) pièi i’avié la sisselando (20m/2,33m) que tiravo soun noum de la vilo de Seyssel en Savoio. I’avié tambèn de barco à founs plat, li coursié que traspourtavon li chivau. Li civadiero cargado de civado pèr apastura li bèsti. La barco de tèsto, aquelo dóu patroun, pourtavo, tancado sus l’empento, la crous escultado dis escorno (5), valènt-à-dire la crous adournado di simbèu de la passioun dóu Criste

La rigo

La rigo, o counvoi de batèu, èro fourmado de tres, cinq o sèt barco. Dóu proumié chivau enjusqu’à la darriero barco lou counvoi poudié s’estalouira sus un kiloumètre. Uno barco se poudié carga pèr lou mai de 750 kg e uno rigo poudié pas despassa li 400 touno. Li marchandiso èron diferènto segound lou sèns dóu viage : blad, civado, bos, drap, minarés de ferre à la desciso, sau, anchoio, proudu de la Mieterrano e d’óutro-mar à la remounto. Pèr faire la desciso, valènt-à-dire la davalado de Liounn à Bèu-Caire, falié dous jour e mié. La remounto prenié de 20 à 40 jour segound l’estat dóu flume.

L’alage

A l’Age-mejan, la desciso se fasié en barco lóugiero em’ uno empento à la pro e uno en poupo. La barco servié qu’un cop e la desmountavon à l’arribado. Pèr la remounto, i’aguè, enjusqu’au mitan dóu siècle 15en, l’alage au sang o au còu. La trahino èro uno chourmo de 80 à 100 pàuri mesquin, óuriginàri dóu Vivarés o de Savoio que soulien (6) se louga pèr saia (7) li barco o coume journadié dins li mas. S’empleguè pièi de biòu, bestiàri pouderous mai incapable de i’ana d’uno bono butado pèr atravessa lis embut o passa lou jougnènt d’un riéu. Amor d’acò li biòu fuguèron ramplaça pèr li chivau de tiro. A l’epoco de Mistral, li chivau ardenés (8), la mai anciano raço de chivau de tiro en Franço, èron majouritàri dins li rigo.

Lis atalage

Pèr tira li counvoi e segound sa taio, falié atala 80, 100 e jusqu’à 120 chivau. Lis ome acoumpagnant lis atalage èron tambèn noumbrous. Pèr 80 chivau falié 50 ome.

L’unita de baso èro lou quadrige, éu-meme coumpausa de dous couble. Davans, à gaucho i’avié lou chivau pourtaire mounta pèr un poustihoun respounsable dóu couble; à sa drecho lou chivau foro man pèr-ço-que s’atroubavo foro de la pourtado de sa man; darrié, dous chivau, li seguènt. Chasque quadrige èro atala à-n-uno maieto dicho encaro carato, religado à la maio que ié disien tambèn calamo, courdage espetaclous de 15 à 20 centimètre de diamètre, estaca à l’aubourié, mast court e soulide de la barco-capitàni. A despart di carretié, i’avié tambèn li marinié de terro coume li sauto-maio, qu’emé l’ajudo de partego esvartavon lis embàrri eventuau : moulin floutant, aubre. D’autre èron carga de rebrounda lou camin d’alage. A l’escabour, li carretié mountavon pas sus li barco e restavon à terro; fasien soun biva sus lou dougan o prenien sa retirado à l’aubergo.

Li sourgènt de Mistral

Pèr escriéure soun pouèmo publica en 1897, Mistral avié de segur pousa i sourgènt doucumentàri seguènt :

- Les bords du Rhône de Lyon à la mer d’Alphonse Balleydier (1843).

- Voyage au Bourg-Saint-Andéol dóu dóutour Francus, à l’estat civil Albin Mazon, Privas 1886; aquel oubrage èi la descripcioun etnougrafico la mai coumplèto de la vido di gènt dóu Rose. Vèire, pèr acò, l’estùdi de J.G. Roux dins lou n° 121 di Nouvello, sus Charles-Albin Mazon un ispiratour dóu Pouèmo dóu Rose, p.p. 14 à 17.

- Le Rhône alpestre et le Valais de Charles Lenthéric 1883.

- Du Saint Gothard à la mer, le Rhône, histoire d’un fleuve Paris, dous voulume, 1883.

- Lou Revestidou o lis equipage dóu Rose dóu felibre marsihés François Dellile 1880.

- Les crimes de Trestaillons d’Antony Réal 1890.

- Mariniers du Rhône de Gabriéu Gérin.

En 1881, Mistral avié douna un tèste dins l’Armana prouvençau entitula : Li carretié.

signat alan
Noto :

Serriero : dounan dins aqueste numerò de foutò de soun Museon di Marinié que devèn à noste gènt coumpan, Andriéu Tourel, un Roïol de Largentièïro que barrulo de-longo en Vivarés. Serriero s’atrovo après Anounai, en ribo de Rose, i counfin d’Ardecho e d’Auto-Lèiro coume di parla d’O. Lou Museon es dins l’anciano glèiso Sant- Sournin. Se rensigna en coumuno pèr li jour e ouro de duberturo. A Serriero an serva, tambèn, la tradicioun de la justo vo targo nautico sus lou Rose. Dins Lou Pouèmo dóu Rose a un noum : Jan Roche. Aiela : escandaia. Lou pan mesuravo de 20 à 23 centimètre segound li rode. Crous couneigudo en Catalougno souto lou noum de crous dis improupèri (óutrage). Soulien : imperfèt dóu verbe ancian soulé (souloir, avoir coutume), eici dounc avaient coutume de se louer pour haler. Saia : haler, tirer. L’ardenés fuguè crousa au siècle XIXen emé lou chivau de tiro bèlge.
La rigo, l’avèn di, èro un counvoi de barco. Mai lou mot èro peréu emplega pèr l’ensèn de l’atalage. Mistral d’aiours fai s’endeveni lou mot emé l’espagnòu recua (conjunto de caballerìa o animales de carga que sirve para trajinar).

barre de fin de page